عن النكبة والفرار إلى الطنطورة: “بذكر قبل الحرب كنا نائمين، فجاء سيدي وصار يوقظنا، ولما ما أفنا صار يشدنا من الشعر، ويقول لنا قوموا إسا بيجوا تبعين زمارين ويقتلونا… مشينا مع الشاطئ بمحاذاة البحر حتى وصلنا الطنطورة، هناك لقينا رجل اسمه محمد حسان، كان يعرف جدي ذيب، فقال له هذا البيت لكم وكان بيت كبير، سكنا حتى صارت الحرب. جابونا وحطونا كومة واحدة بجانب البحر… اليهود حفروا جورة كبيرة وقعدونا مقرمزين (الفر فصاء) وصاروا يجيبوا الأموات ويدبوها بالجورة، وإحنا شايفين كل إشي لكن ما منقدر نحكي”.
عن عودتهم إلى الجسر: “بعد فترة أجل شمشوم وابن غزال وطلبوا يرجع أهل الجسر على الجسر، لأنه تبين إنه مش أهل الجسر إلي قتلوا الناطور وأخذوا سلاحه طلع واحد يهودي إلي قتله، شمشوم قال: إحنا عرفنا مين إلي قتله الي قتله يهودي مش عربي. ارجعنا على الجسر كلها أطفال ونساء والرجال بقيت في السجن، ومنهم سيدي ذيب وأبوي وعمي بقياو 9 شهور بعدين أطلقوا سراحهم”.
عن زواجها المبكر: “تزوجت وأنا عمري 14 سنة فصرت أيكي وأقول لأبي يا بوي بعدني صغيرة يابا كيف بدك تزوجني؟ لكنه لم يسمع واستمر بعناده… كنت صغيرة حملت وأنا صغيرة، تصور طفلة وحامل في بطنها، وتحمل هموم العائلة، روحي اطبخي روحي اعجني على الحطب… من يوم فتحت عيوني على الدنيا وأنا أعيش بالظلم، حياتي كلها ظلم، والدي زوجني صغيرة”.
عن الحياة في الماضي: “كانت حياة شاقة، لكنها إذا قورنت بتقدم الحياة فتلك الأيام أفضل لأنه البلد كلها كانت زي بيت واحد، صحيح ما في مستشفيات ولا أدنى مقومات الحياة، لكن قرب الناس من بعض كان يعطي رونق للحياة، لم يكن هناك عنف، قتل، ما بعرف الواحد على شو انقتل ولا على شو قتل”.

